第一次與老虎近距離接觸 | 是拉差龍虎園

 

泰國有好多動物園，其實來來去去都係差唔多，但就係唔知點解每次都要去一去先安樂😅。

上次去嘅係是拉差龍虎園，主要都係睇下大象表演、鱷魚表演同老虎表演咁，記憶中最攪笑係睇〝數字豬〞🐷，〝數字豬〞傳聞係一隻識計數嘅豬，例如問佢1+3等如幾多，佢就會自己去搵個4字出黎，雖然唔知點解可以做到 (又或者佢真係咁聰明)，但都無必要去深究啦，旅行嘅目的係放鬆同享受吖嘛，睇得開心睇得過癮咪得囉, 係咪😉？

尼一次去動物園，小編亦獻出咗人生嘅第一次🤫 (相信都係唯一嘅一次)，就係親身嘗試餵老虎BB喇。可惜……世事總係事與願違😞，原本小編與旅伴帶住充滿期待嘅心情坐低等待緊老虎BB，點知一見到工作人員抱住果隻〝老虎BB〞行埋黎時瞬間所有期待同喜悅都煙消雲散😳，心諗：尼隻都叫BB?！果隻〝BB〞足足超出哂小編與旅伴二人嘅橫度，當工作人員將〝老虎BB〞放低時小編真係完全唔敢郁動絲毫，只可以僵硬咁拎住個奶樽，而〝老虎BB〞亦將佢隻〝小手〞搭住小編嘅左手，當時只係感覺到被搭住嘅地方有D痛……好唔容易等到夠鐘，工作人員抱返起隻〝老虎BB〞嘅時候，小編發現被搭住嘅地方有3點已經損咗甩皮 (唔係淺層果種)……從此之後小編對所有動物都採取『只可遠觀不可褻玩』嘅宗旨做人。

所以呢？人生每一個旅程每一個經歷都有可能改變往後嘅人生觀，造成唔同嘅諗法同結果。

唔知大家又有無遇過一D事情而令自己改變呢？

#泰國#芭提雅#是拉差龍虎園#餵老虎#數字豬#人生經歷#thailand #pattaya #Sriracha Tiger Zoo #feed the tiger #digitalpig #life experience

多采多姿的夜生活 | 芭提雅

 

多采多姿的夜生活| 芭提雅

芭提雅，除咗必玩嘅陽光與海灘之外，點小得體驗一下當地最出名嘅夜生活呢😉？

睇人妖show、真人表演、行夜市、步行街、坐〝篤篤〞尼D都一定係指定動作。

相信大家都有去過泰國睇人妖show (其實小編比較喜歡稱呼佢地為〝變性人〞，感覺比較尊重，同埋始終妖妖聲都唔係咁好聽吖嘛😅，你地話係咪？！)

如果大家同小編一樣係十幾廿年前睇嘅話，應該會發現以前嘅變性人靚好多，真係可以話係世界級〝靚女〞😍😍，同依家果D真係好唔同。有時喺泰國見到D顏值比較高嘅女性，身邊朋友就會開始討論究竟佢係(真)女人定係變性人，會有好多種講法例如：睇手睇腳睇身型睇骨架……等等等等，但每當有朋友問小編意見嘅時候，小編就會話：有一個最簡單直接嘅方法，就係直接行過去同佢講句泰文嘅〝妳好〞，咁咪清楚哂唔洗估囉🤣。

至於真人表演都係果D啦……有睇過嘅朋友就知🤭。

泰國嘅夜晚真係比日頭多采多姿同熱鬧好多，除咗啱啱講嘅表演之外，亦都可以去行下夜市同步行街，夜市就好似女人街咁乜都有得買，比較容易買到手信；而步行街就更加五光十色，充滿食肆同酒吧，酒店都分唔同種類，有普通三五知己飲酒嘅，有可以搵〝朋友〞傾計嘅，有女仔喺枱跳舞嘅，亦有D有拳賽睇嘅，形形式式任君選擇，只要小心選擇就可以。

夜晚買完玩完坐返程〝篤篤〞返酒店，吹住微風欣賞下沿途果種熱鬧繁囂都真係幾舒服😇。

有次小編竟然破咗戒，返到酒店附近見到有個車仔檔賣串燒 (好似以前新年喺街邊賣野食果D細細車仔檔)，因為佢燒得實在太香，所以忍唔住買咗黎食😋，尼D只係賣港幣$2一串嘅串燒，小編之後喺泰國都無再見過lu……。

唔知大家喺芭提雅有無奇遇呢？ 或者其他經歷都可以同我地分享一下架😊。

#泰國#芭提雅#真人表演#泰國表演#人妖#泰拳#無上裝#桌上舞#泰國夜市#泰國步行街#篤篤#泰國手信#泰式串燒#夜生活#Thailand #Pattaya #Live show #Thai show #shemale #Muay Thai #Topless #table dance #Thainight market #Thai Walking Street #tuk tuk #Thai souvenirs #Thai skewers #nightlife

我的恐怖回憶 | 泰國芭提雅

 

泰國尼D旅遊熱點又何止去一次吖，第一次感受完舊式旅行團，相隔幾年後小編又再一次去泰國玩，由於當地旅遊業已經開發咗一段時間，所以選擇亦都多咗，除咗有傳統嘅〝購物團〞之外，亦開始多咗玩樂性質嘅景點😀。

果次小編就選擇咗去港人同外國人都好熱愛嘅芭提雅 (至少當年係🤣)。

芭提雅比小編嘅感覺唔錯，天氣好景色好，簡單寧靜又唔算多人 ，唯一嘅一樣野係唔敢喺街買野食 (見到用膠袋黎裝飲品食物感覺……🤢)。

而當年果D咩布吉島、PP島、蘇梅島、象島、沙美島等等全部都未加入旅遊行列，可以話芭提雅係當時陽光與海灘嘅唯一選擇。

當年去得芭提雅必玩嘅降落傘、玻璃船、水上電單車小編都玩過哂 (可能係被玩🙈)，而且重有非常深刻嘅回億添。

玩降落傘之前要先坐〝大飛〞出海去海中心個〝浮台〞(其實應該係話大船先啱)，想當年少不更事, 一上〝大飛〞就即刻走去船頭坐，檸轉頭見到個船家望住我但我無理佢，照樣霸住船頭個位，點知……一開船就知出事, 架〝大飛〞真係一路咁飛 (直情係成個船頭離開水面果種)，重要上上落落咁〝櫈〞，成個人都差D被拋起，小編當時唯一可以做嘅就係雙手用力捉緊條欄 (真係非常high high + 魂魄唔齊)，飛咗好一陣子終於都停落黎，一回魂之後只係覺得一對手踭好鬼痛, 而且重瘀哂……😭。

上到浮台只係聞到好大陣電油味，跟住大隊著救生衣, 比人拉上天再落返黎，整個過程都係迷迷糊糊……🥴。

玩完降落傘之後就去咗坐〝玻璃船〞睇珊瑚，果隻〝玻璃船〞，小編感覺佢實情就係一隻〝生板〞，開頭以為只係接駁船，點知坐咗上去之後，個船夫突然抽起船底塊木板然後用手指一指，我地就向下望……原來所指嘅珊瑚礁就喺船底😲，小編眼力唔好睇唔到D乜, 大家又睇唔睇到呢？

最後，去玩水上電單車，由於小編一向都忌水，但無理由掉低個旅伴自己一個人玩架，咁就唯有硬住頭皮坐車尾，旅伴揸住架水上電單車向海中央出發, 小編都覺得無乜問題，突然去到海中央架車停咗喺度，小編真係驚到完全〝硬哂呔〞連野都講唔到🥶……，依家諗返都重有D陰影。

#泰國 #芭提雅 #旅遊分享 #旅遊體驗 #陽光與海灘 #降落傘 #玻璃船 #珊瑚礁 #水上電單車 #美好回憶 #快艇 #Thailand #Pattaya #travelsharing #travelexperience #sun and beach #parachute #glassboat #coralreef #waterbike #goodmemories #speedboat